پښتونخوانړۍښځېلوبېويډيوګانېځانګړې پاڼېکالم په ۱۵،۷ میلیون ډالرو پلورل شوی الماس "وړیا" بلل کېږي

16 تله 1399

یو ناویات یا کمیاب سپین الماس چې ۱۰۲ قیراطه وزن لري په لیلام کې ۱۵ میلیون او ۷ لکه ډالر وپلورل شول، خو کارپوهان یې دا پلور "وړیا" بولي.

دا الماس د ټلیفون له لارې یوه ناپېژاند کس لیلام کې وپېره.

هانکانګ کې ساتبیز لیلام دا ځل خپله لیلامي د کورونا وبا له امله پرلیکه یا انلاین وړاندې کړه.

دا الماس له ۲۷۱ قیراطي ډبرې توږل شوی او دا ډبره پر ۲۰۱۸ کال د کاناډا یوه کان کې موندل شوې وه.

په دې کیفیت تراوسه یوازې اوه نور الماس چې هر یو له سل قیراطو درون و په لیلام کې پلورل شوي دي.

ساتبیز دا الماس "بې نقصه" بولي او وايي: "هرڅومره یې چې د ښکلا او ناویاتۍ په هکله وویل شي، بیا هم کم دي. "

د دې الماس د لیلام لپاره پلورونکي بیه ټاکلې نه وه.

دا په تاریخ کې لومړی ځل دی چې یو الماس له بیې ټاکلو پرته په لیلام کې پلورل کېږي.

د "۷۷ډایمنډز" په نوم د اینټرنیټي ګاڼو لوی مدیر توبیاس کورماینډ د دې الماس دا بیه "وړیا" وبلله.

ښاغلی کورماینډ وايي: "پلورونکي د لږ تر لږه بیې نه ټاکلو سره زړوره پرېکړه وکړه، خو ښه نتیجه یې نه درلوده. "

پر ۲۰۱۷ کال هغه غاړه کۍ چې ۱۶۳ قیراطه الماس یې درلود په ۳۳ میلیون او اوه لکه ډالرو د جنیوا په کریسټیز لیلام کې وپېرل شو.

هغه الماس په انګولا کې له ۴۰۴ قیراطه ډبرې توږل شوی و او ویل کېږي تر ټولو لوی الماس و چې پېرل کېده. د هغه پېرونکی هم مالوم نه و.

همغه کال یو بل الماس چې له ۱۹ قیراطو لږ سپک و په ۴۲ میلیون او درې لکه ډالرو په کریسټیز لیلام کې وپېرل شو. دا د یو قیراط الماس لپاره تر ټولو ګرانه بیه ده.

د کریسټیز لیلام د اروپايي څانګې د مسوول په خبره، د هر قیراط لپاره درې میلیون او شپږ لکه ډالرو د دې الماس لپاره نړیوال ریکارډ جوړ کړ.

یو قیراط له ۲۰۰ میلي کرامو سره برابر دی.

دغه مطلب ته ستوری ورکړه
(0 رایې)