د افغانستان یوه خصوصي شرکت د لومړي ځل لپاره تاجکستان ته زراعتي ماشین الات صادر کړل.

29 غبرګولی 1399

په ننګرهار کې جاوېد افغان شرکت وایي، ۱۲ ترېشر ماشینونه‌یې چې غنم له پروړې بېلوي، تاجکستان ته استولي دي.

د دې شرکت رئیس او څښتن تور ملنګ شګیوال ازادي راډیو ته د چهارشنبې په ورځ وویل، هر ماشین ۲۰۰ زره افغانۍ پلورل شوی دی چې د سې شنبې په ورځ تاجکستان ته ورسېدل.

ښاغلی شګیوال زیاتوي: "د دې ماشین الاتو ۷۵ په سلو کې خام مواد د افغانستان د داخل دي. موږ د اوسپنې د ویلي کېدو فابریکه لرو چې د دې ماشین الاتو پرزې جوړوي او پاتې پرزې له چین او ترکیې واردوو."

ښاغلي شګیوال زیاته کړه چې د دوی له دې ماشینونو څخه د افغانستان په ټولو ولایتونو کې خلک کار اخلي او هڅه‌یې دا ده چې راتلونکی کال خپل صادرات د ازبکستان، قزاقستان او قرغزستان بازارونو ته پسې پراخ کړي.

دغه مطلب ته ستوری ورکړه
(0 رایې)